Shu yilning 20 mart kuni ijtimoiy tarmoqlarda Farg‘ona shahridagi 5-oilaviy poliklinikada koronavirus infeksiyasiga chalingan bemor aniqlanibdi, degan mazmundagi asossiz va shov-shuvli xabar tarqaldi, deya xabar bermoqda Sog‘liqni saqlash vazirligi Jamoatchilik bilan aloqalar bo‘limi.

SSV sog'liqni saqlash vazirligi
Foto: Sog’liqni saqlash vazirligi matbuot xizmati

Gap shundaki, shu kuni mazkur poliklinikaga 2001 yilda tug‘ilgan Farg‘ona shahridagi go‘zallik salonlarining birida faoliyat ko‘rsatuvchi xodim X. D. tana haroratining oshishi, tamoq og‘rishi shikoyati bilan ushbu tibbiyot muassasasiga murojaat qilgan. Tibbiyot xodimlari tomonidan u belgilangan tartibda tibbiy ko‘rikdan o‘tkazilgan. Ammo bemor vrachga o‘z shikoyatlarini bayon qila turib, yaqinda Rossiyada bo‘lib qaytgan fuqaro bilan muloqotda bo‘lganligini aytib, barchani vahimaga solgan. Bu esa ko‘pchilik o‘rtasida asossiz mish-mish tarqalishiga ham sabab bo‘lgan.

– Shundan so‘ng belgilangan tartibda poliklinika ma’sul xodimlari tomonidan viloyat sog‘liqni saqlash boshqarmasi shtabiga xabar berilgan, -deydi viloyat sog‘liqni saqlash boshqarmasi boshlig‘i Odiljon Umarov . -Ko‘rilgan tezkor tadbirlar va ehtiyot choralari natijasida bemorga zudlik bilan maslahat guruhi yuborilib, epidemiologik anamnezi to‘liq o‘rganilib, profilaktik nuqtai nazardan yuqumli kasalliklar shifoxonasi izolyatoriga yotqizilgan. Koronavirusni aniqlash uchun PZR usulida tekshirish uchun surtma olindi. Shu bilan birga, uning oila a’zolari ham qat’iy tibbiy kuzatuvga olingan.

So‘nggi ma’lumotlarga qaraganda, bemordan shu yilning 20 mart kuni viloyat SEO virusologiya bo‘limi xodimlari tomonidan PZR usulidagi №197 sonli olingan tahlil xulosasiga ko‘ra, unda koronavirus infeksiyasi aniqlanmagan.

Hurmatli fuqarolar, koronavirus bilan bog‘liq vaziyat sabab vahima ko‘tarishga asos yo‘q. Virusni yuqtirib olmaslik uchun sanitariya-gigiyena qoidalariga qat’iy rioya qilishingizni so’raymiz.