Test sinovlari 2-sentabrdan boshlandi va kuniga 2 marta, havo salqin paytda o‘tkazildi. Bu haqda DTM direktori o‘rinbosari Sardor Rajabov AOKAda o‘tkazilayotgan brifingda ma’lum qildi.

Foto: AOKA

Bunda, test sinovlari birinchi smenada 08:00 dan 11:00 gacha, ikkinchi smenada 17:00 dan 20:00 gacha bo‘lib o‘tdi.

Test sinovlari Farg‘ona viloyatida 10 kunda (11 sentyabr  kuni), Buxoro, Jizzax, Namangan, Samarqand va Xorazm viloyatlarida 11 kunda (12 -sentyabr kuni), Qoraqalpog‘iston Respublikasi, Andijon, Surxondaryo, Qashqadaryo, Navoiy, Sirdaryo viloyatlari va Toshkent shahrida 12 kunda (13 sentyabr kuni) yakunlandi.

Test sinovlarida bir smenada 1975 ta guruhda 59 250 nafar abituriyent, bir kunda 3950 ta guruhda 118 500 nafar abituriyent ishtirok etishi uchun tayyorgarlik ko‘rildi.

Jarayonga guruh nazoratchisi sifatida 3705 nafar pedagog xodimlar jalb etildi.

Test sinovlarida ishtirok etishi belgilangan 1 mln 304 ming 194 nafar abituriyentdan 1 mln. 240 ming 614 nafari (95,1 %) ishtirok etdi.

63 ming 580 nafari esa (4,9 %) turli sabablarga ko‘ra test sinovlarida ishtirok etmadi.

Jami 1 187 nafar abituriyent turli sabablarga ko‘ra test sinovlaridan chetlatildi. Shundan 548 nafari hududga kirishda, 639 nafari esa test sinovi jarayonida aniqlangan.

Jumladan, hududga kirishda (eng ko‘p kuzatilgan):

  • 367 nafar abituriyent telefon olib kirishga uringani; 
  • 48 nafari shpargalka olib kirishga uringani;
  • 118 nafari o‘ringa o‘rin kirishga harakat qilgani;
  • 10 nafari hujjat soxtalashtirgani uchun.

Test sinovi jarayonida (eng ko‘p kuzatilgan):

  • 491 nafar abituriyent telefondan foydalangani;
  • 68 nafari shpargalkadan foydalangani;
  • 27 nafari o‘ringa o‘rin kirgani uchun test sinovlaridan chetlatildi.

Mavzuga doir:
Abituriyentlarning apellyatsiya shikoyatlarini ko‘rib chiqish tartibi qanday?
Madrasalarda qabul imtihonlarini o‘tkazish kunlari belgilandi

Qolgan abituriyentlar kalkulyator olib kirishga uringanligi, shaxsi tasdiqlanmaganligi, o‘zaro gaplashganligi, test materiallarini almashtirgani, test materiallarini olib chiqishga uringanligi kabi turli sabablar bilan test sinovlaridan chetlatilgan.