Livanning “Abou Merhi Group” kompaniyasiga qarashli “Orient Queen” kruiz layneri Bayrut portida kuchli portlashdan so‘ng suvga g‘arq bo‘ldi. Bu haqda bugun, ya’ni 5-avgust kuni “OTV” telekanali xabar berdi.

Foto: Simplonpc

Yuz bergan hodisa oqibatida ikki kishi halok bo‘ldi, yetti nafar ekipaj a’zosi jarohatlangan.

Kema xo‘jayini Abu Mari o‘z navbatida layner Bayrut portida prichalga bog‘lab qo‘yilganiga aniqlik kiritdi. Portlash kruizga jiddiy zarar yetkazgan. Korpusdagi teshikni yamashga har qancha urinishmasin, unga suv kirib, kema cho‘ka boshlagan.

Kemalarni kuzatuvchi “Marine Traffic” xizmatining ma’lum qilishicha, uzunligi 121 m. va suv sig‘imi 7,4 ming tonna bo‘lgan “Orient Queen” layneri 1989-yilda qurilgan bo‘lib, Bagama orollari bayrog‘i ostida suzgan.

Yo‘lovchi kemasi Saudiya Arabistonidan Livangacha bo‘lgan o‘zining oxirgi 21 kunlik sayohatini 27-iyun kuni tugatib, Bayrut prichaliga bog‘lab qo‘yilgan edi.

Eslatib o‘tamiz, Bayrutning port mavzesida 4-avgust kuni kuchli portlash yuz berdi. Undan avval yana bir, kuchsizroq portlash kuzatilgan. Ikkinchi portlashning to‘lqini kuchi 3,3 magnitudali zilzilaga teng seysmik to‘lqinlarni keltirib chiqardi.

Mavzuga doir:
Bayrutdagi portlash prezident qarorgohiga jiddiy zarar yetkazdi

Port yaqinida joylashgan bir qancha imoratlarning fasadlari qulab tushgan, turarjoy uylari va idoralar shikastlangan.

Bayrut gubernatori Marvan Abbudning so‘zlariga ko‘ra, sodir bo‘lgan voqea natijasida taxminan 300 ming kishi boshpanasiz qolgan.

Oxirgi ma’lumotlarga ko‘ra, 113 kishi halok bo‘lgan, 4 mingdan ortiq kishi jarohatlangan.